EMC-ისა და იდენტობას ერთობლივი განცხადება საბი ბერიანის მკვლელობასთან დაკავშირებით გამოვლენილი დამატებით დეტალების შესახებ

emcidendtoba

13.11.2014

2014 წლის 12 ნოემბერს, არასამთავრობო ორგანიზაციებს – “ადამიანის უფლებების სწავლებისა და მონიტორინგის ცენტრს” (EMC) და “იდენტობას” დაგვიკავშირდა ბიანკა შიგუროვა, რომელმაც საბი ბერიანის მკვლელობის საქმეში ბრალდებულ პირთან დაკავშირებით დამატებითი ფაქტობრივი გარემოებების შესახებ მოგვითხრო. ბ. შიგუროვას ახსნა-განმარტება, რომელიც მოკლული საბი ბერიანის მსგავსად, თავს ტრანსგენდერ თემს მიაკუთვნებს, მომხდარ მკვლელობაზე გამოძიების ოფიციალურ ვერსიასთან დაკავშირებით შეკითხვებს აჩენს. ხელმომწერი ორგანიზაციების შეფასებით, მნიშვნელოვანია, შინაგან საქმეთა სამინისტრომ აღნიშნული საკითხი დროულად შეისწავლოს და მაღალი საზოგადოებრივი ინტერესის გათვალისწინებით, საქმეზე დამატებითი საჯარო განმარტებები გააკეთოს.

ჩვენთვის მოცემულ ახსნა-განმარტებაში ბ. შიგუროვა უთითებს, რომ 2014 წლის 10 ოქტომბერს, საბი ბერიანის მკვლელობამდე რამდენიმე საათით ადრე, 20:00 საათისთვის, მკვლელობაში ბრალდებული პირი მასთან სახლშიც მივიდა და მასზე ფიზიკურად იძალადა. კერძოდ, ბიანკასთან შეხვედრისთანავე, ბრალდებული მას ყოველგვარი ახსნა-განმარტების გარეშე, მოულოდნელად დაესხა თავს და გულის არეში ელექტროშოკით დარტყმა მიაყენა. შიგუროვას თქმით, მან თავდამსხმელს ელექტროშოკის აპარატი ხელიდან გააგდებინა, თუმცა, ის თავადაც დაეცა იატაკზე. ამის შემდეგ, თავდამსხმელმა მას ყელში ხელები წაუჭირა და მისი დახრჩობა სცადა. თუმცა, ბიანკამ დაყვირება და მის ბინაში მცხოვრები მეგობრის დაძახება შეძლო, მეგობარმა კი დასახმარებლად მეზობელს მოუხმო. ერთობლივი ძალისხმევით, მათ თავდამსხმელის სახლიდან გაგდება შეძლეს. ბიანკას თქმით, მეზობელი თავდამსხმელს გაედევნა და ქუჩაში გაიგონა, მან ტელეფონით სხვა პირებს როგორ გადასცა ინფორმაცია მისი ადგილსამყოფელის შესახებ და დასახმარებლად ადგილზე მოსვლა სთხოვა. ბიანკას განცხადებით, ის მოგვიანებით ტელეფონით დაუკავშირდა თავდამსხმელს და სცადა მისთვის აეხსნა, რომ განმეორებით თავდასხმის შემთხვევაში, იგი პოლიციას მიმართავდა, რა დროსაც, თავდამსხმელმა მას განუცხადა, რომ  ის თავად იყო პოლიციელი და არაფრის ეშინოდა.

ბიანკას თქმით, თავდამსხმელს არაფერი უთქვამს, ან უკითხავს საბი ბერიანის შესახებ და მასზე თავდასხმის ეპიზოდს პირდაპირი კავშირი საბი ბერიანის  მკვლელობის საქმესთან არ აქვს.

ბ. შიგუროვას განცხადებით, ის და მის ბინაში მცხოვრები მეგობარი, მომხდართან დაკავშირებით, 12 ნოემბერს, პოლიციამ მოწმის სტატუსით დაკითხა. თუმცა, მათ ჩვენებას გამოძიების საჯაროდ გაცხადებულ ვერსიაზე, რომ მკვლელობა ანგარების მოტივით იქნა ჩადენილი, გავლენა არ მოუხდენია. ბიანკას თქმით, მის მიმართ განხორციელებული ძალადობის საქმეზე პროკურატურამ მას ამ დრომდე დაზარალებულის სტატუსი არ მიანიჭა. ბ. შიგუროვასა და მისი მეგობრის თქმით, საგამოძიებო ორგანოებში ყოფნისას, ზოგიერთმა თანამშრომელმა მათ მიმართ ტრანს- და ჰომოფობიური სიძულვილის ენა გამოიყენა.

მიგვაჩნია, რომ ბ. შიგუროვას ჩვენებას გადამწყვეტი მნიშვნელობა უნდა ჰქონდეს საბი ბერიანის მკვლელობის საქმეზე სიმართლის დადგენისათვის. ბ. შიგუროვას ახსნა-განმარტება აჩვენებს, რომ ბრალდებულმა, მკვლელობის დღეს, ძალადობა რამდენიმე დამოუკიდებელ ეპიზოდში ტრანსგენდერი პირების, როგორც ლგბტ თემის წევრების მიმართ განახორციელა და ამდენად, მისი ქმედება სავარაუდოდ  გენდერული იდენტობის გამო, სიძულვილით იყო მოტივირებული. ეს გარემოება ეჭვებს აჩენს გამოძიების ოფიციალურ ვერსიასთან დაკავშირებით, რომ მომხდარი ანგარებით ჩადენილ ტიპურ მკვლელობას წარმოადგენდა. ცხადია, სისხლის სამართლის საქმესთან დაკავშირებული გარემოებების შეფასება სცილდება ჩვენს მანდატს, თუმცა, სიძულვილით მოტივირებული დანაშაულების პრევენციის მიზნით, მნიშვნელოვანია, შინაგან საქმეთა სამინისტრომ გამოძიების პირველად ოფიციალურ ვერსიასთან დაკავშირებით გაჩენილ შეკითხვებს დასაბუთებული პასუხი გასცეს და საქმეზე ყოველმხრივი და ეფექტური გამოძიება ჩაატაროს.

ბ. შიგუროვასა და სხვა მოწმეების ახსნა-განმარტებების საფუძველზე, ხელმომწერი ორგანიზაციები დასაბუთებული განცხადებით მივმართავთ შინაგან საქმეთა სამინისტროს და მოვითხოვთ, რომ მან

  • შეისწავლოს ბ.შიგუროვას მიმართ განხორციელებული ძალადობის ეპიზოდი და საბი ბერიანის მკვლელობის საქმესთან კავშირში, მას სათანადო სამართლებრივი შეფასება მისცეს. ამ მხრივ, არსებითია, გამოძიებამ შეისწავლოს გენდერული იდენტობის გამო სავარაუდო სიძულვილის მოტივი, რომელიც გამოვლენილი ძალადობის ორივე საქმეში უნდა დომინირებდეს;
  • ბ. შიგუროვას მიმართ განხორციელებულ ძალადობის ფაქტზე დამოუკიდებლად დაიწყოს გამოძიება და მას დაზარალებულის სტატუსი მიანიჭოს. ასევე, უზრუნველყოს ბ. შიგუროვას მიერ ბრალდებული პირის ამოცნობის ჩატარება;
  • მიიღოს სათანადო სამართლებრივი ზომები ბ. შიგუროვას პირადი ხელშეუხებლობისა და უსაფრთხოების უზრუნველყოფის მიზნით;
  • უზრუნველყოს მისი თანამშრომლების მიერ ლგბტ პირთა უფლებების პატივისცემა და აღკვეთოს მათი მხრიდან სიძულვილის ენის გამოყენება.