“ადამიანის უფლებების სწავლებისა და მონიტორინგის ცენტრი (EMC)”, 2019 წლის 4 აპრილს, ორგანიზებას გაუწევს ერთდღიან ტრენინგს სისხლის სამართლის ადვოკატებისთვის, თემაზე “მოქმედი ნარკოპოლიტიკა და ადამიანის უფლებები”. 

ნარკოპოლიტიკა კვლავ უსამართლოდ მკაცრი და არაჰუმანურია. წელიწადზე მეტია, შეჩერებულია ნარკოპოლიტიკის ფუნდამენტური რეფორმა და პარლამენტში წარდგენილი საკანონმდებლო ცვლილებათა პაკეტის განხილვა. საზოგადოებრივ ჯანდაცვაზე ორიენტირებული მიდგომების ნაცვლად, ნარკომომხმარებლების მიმართ კვლავ რეპრესიული სისხლისსამართლებრივი პოლიტიკა  მოქმედებს. გამოწვევად რჩება ნარკოტიკული დანაშაულების სრულყოფილი გამოძიების, გამოყენებულ სასჯელთა პროპორციულობის, ნარკომომხმარებელთა მკურნალობისა და რეაბილიტაციის სერვისების ხელმისაწვდომობის საკითხები.

ტრენინგის მიზანია, სისხლის სამართლის ადვოკატებთან ერთად მოქმედი ნარკოპოლიტიკის გამოწვევების განხილვა, ნარკოპოლიტიკის ცვლილების მიზნით მომზადებული საკანონმდებლო ცვლილებების შინაარსის განხილვა, ნარკოტიკული დანაშაულის მიმართ სახელმწიფოს პოლიტიკასთან დაკავშირებით ცნობიერების ამაღლება და ნარკოპოლიტიკისა და ადამიანის უფლებების სფეროში ცოდნის და მგრძნობელობის გაზრდა სისხლის სამართლის ადვოკატებისთვის. ამ მიზნით, ტრენინგის ფარგლებში მიმოხილული იქნება  ნარკოტიკულ დანაშაულებთან მიმართებით საკანონმდებლო და მართლმსაჯულების პრობლემები, საკონსტიტუციო სასამართლოს როლი ნარკოპოლიტიკის ლიბერალიზაციის თვალსაზრისით.

ფორმატი:

ტრენინგზე ნარკოპოლიტიკის სფეროს ექსპერტები, ნარკოლოგები, ადამიანის უფლებებზე მომუშავე ორგანიზაციების წარმომადგენლები  და აქტივისტები წაიკითხავენ მოხსენებებს ნარკოპოლიტიკის და ადამიანის უფლებების სფეროში არსებულ აქტუალურ საკითხებზე. თითოეული სესიის შემდეგ გათვალისწინებული იქნება დრო ტრენინგის მონაწილეთა მოსაზრებების, შეკითხვებისა და დისკუსიისთვის. ტრენინგის ხანგრძლივობა: 10:00-17:00 საათი.

მონაწილეთა შერჩევა:

ტრენინგში მონაწილეობის მსურველებმა უნდა შეავსონ სპეციალური სააპლიკაციო ფორმა.

ტრენინგში მონაწილეობის შესაძლებლობა ექნებათ სისხლის სამართლის, ან საერთო სპეციალიზაციის ადვოკატებს, რომლებიც აწარმოებენ ნარკოტიკულ დანაშაულთან დაკავშირებულ საქმეებს. მონაწილეთა შერჩევა მოხდება ტრენინგისთვის განკუთვნილი სააპლიკაციო ფორმების შეფასების საფუძველზე. ორგანიზაცია დაუკავშირდება შერჩეულ კანდიდატებს.

ტრენინგში მონაწილეობის მისაღებად შევსებული სააპლიკაციო ფორმის გამოგზავნის ბოლო ვადაა 2019 წლის 28 მარტი, შემდეგ მისამართზე: [email protected].

გთხოვთ, სათაურის ველში მიუთითოთ: „ტრენინგი სისხლის სამართლის ადვოკატებისთვის.“

დამატებითი ინფორმაციისთვის ან კითხვების არსებობის შემთხვევაში შეგიძლიათ მოგვმართოთ:

ტელ: +995 32 2 233 706

ელ-ფოსტა:[email protected] 

https://www.facebook.com/EMCRIGHTS/